egyptusonly: 2008

الخميس، 13 نوفمبر 2008

انا متضامن مع هذا الرجل الشريف

الجمعة، 31 أكتوبر 2008

بنت الباشا الظابط بتبلطج في الشارع - فيديو من وائل عباس

الأعزاء قراء المدونة... تم إغلاق التعليقات على هذه التدوينة لأسباب ما... شكرا

فيديو من وائل عباس
هل تحقق النيابة العامة مع صاحبة السيارة ملاكي (اسكندرية) رقم 180707 أم ستحقق مع وائل عباس؟؟

هل ما في الكليب هنا من إرهاب لمواطنين بعصا مكهربة جريمة أم لا؟
هل شتيمة مواطن من مواطنة بقولها "*س امين أم اللي خلقك" هو أمر يستدعي المساءلة القانونية ... ولا عادي يعني؟؟

أغلب الظن إنه عادي يعني... ومين عارف يمكن يمسكوا وائل كالعادة باعتباره بيروج لفيديوهات مفبركة مسيئة

هههههههههههههههههه

رجاء نشر الكليب على أوسع نطاق وإرساله عبر الفيسبوك والبريد الإلكتروني لتجريس بنت الباشا

الأربعاء، 29 أكتوبر 2008

احلى دمااااااااااااااااغ

الأحد، سبتمبر 17، 2006

انت واحد ولا اتنين؟

انت واحد ولا اتنين؟

ايه السؤال المتخلف ده انا واحد طبعا

انت واحد ولا اتنين؟

ياعم قولتلك انا واحد

طيب خلى بالك من نفسك

ماشى ياعم

مش قولت ان انت واحد؟

اه

امال مين نفسك اللى انت هتخلى بالك منها؟

انت شكلك عامل دماغ وبتفوق عليه

لأ والله ابدا

امال فى ايه بس ياعم ده انت هتخلينى اتنين وانا مش حاسس؟

ما هو المشكلة ان احنا مش حاسين بس عارفين

عارفين ايه؟

ان كل واحد فينا اتنين انت ونفسك وزى ما نفسك بتقولك انت بتعمل مش زى ماانت عايز تعمل بتعمل نفسك تقولك صلى تصلى تقولك اكدب تكدب

على كده بقى مين اللى هيخش فينا الجنة ولا النار انا ولا نفسى ؟

انت طبعا

طب ماهى نفسى هى اللى بتقوللى زى ماانت قولت

بس انت اللى بتعمل مش نفسك

والله انت تعبتنى معاك يعنى ايه العمل دالوقت؟

العمل انك تخلى بالك من نفسك وماتخليش نفسك تقولك على حاجة غلط عشان انت تخش الجنة لو كنت عايز

اكيد عايز

بقولك ايه هقوم اصلى الظهر وارجع لك

...............................................................

للحديث بقية

الخميس، سبتمبر 14، 2006

ايديه فى جيوبى

ايديه فى جيوبى وقلبى طرب

سارح فى غربة بس مش مغترب

وحدى لكن ونسان وماشى كده

ببتعد معرفش او بقترب

اسألو صلاح جاهين كان قصده ايه؟ المعنى كبير قوى يا جماعة وانت اللى ايديك فى جيوبك وانت اللى بتسأل نفسك يبتبعد ولا بتقترب؟ بس عمرك ماتقدر تعبر عن نفسك بالمختصر المفيد زى ما صلاح جاهين عبر عن نفسه وعنك فى الكلمتين دول

يا ترى فهمتها ولالأ؟

لو فهمتها ياريت تقولى فهمت ايه ؟وبعدها اقوللك انا فهمت ايه؟؟؟؟؟؟؟؟؟؟؟؟؟

الثلاثاء، سبتمبر 12، 2006

السبع خطايا

بسم الله الرحمن الرحيم

إِنَّا عَرَضْنَا الْأَمَانَةَ عَلَى السَّمَاوَاتِ وَالْأَرْضِ وَالْجِبَالِ فَأَبَيْنَ أَن يَحْمِلْنَهَا وَأَشْفَقْنَ مِنْهَا وَحَمَلَهَا الْإِنسَانُ إِنَّهُ كَانَ ظَلُومًا جَهُولًا (72) لِيُعَذِّبَ اللَّهُ الْمُنَافِقِينَ وَالْمُنَافِقَاتِ وَالْمُشْرِكِينَ وَالْمُشْرِكَاتِ وَيَتُوبَ اللَّهُ عَلَى الْمُؤْمِنِينَ وَالْمُؤْمِنَاتِ وَكَانَ اللَّهُ غَفُورًا رَّحِيمًا (73) صدق الله العظيم

وحملها الانسان انه كان ظلوما جهولا وكان الله غفورا رحيما لست فقيها فى القرآن ولكن تأمل هذه الاية الكريمة ثوانى ستقول لا تعليق

فعصياننا ما هو الا جزء من ايمانا برحمة ربنا وهذا لو دل يدل على قمة جهلى وظلمى لنفسى ياعم ربنا يسترها علينا ياعم ربنا يرحمنا دى رحمة ربنا واسعة بالذمة فى اكتر من كده جهل

عارف ايه هما السبع خطايا لو مش عارف اقولهم لك بس وانت بتقراهم حاول تعرف ايه منهم موحود فيك وهما يا سيدى الطمع, الكسل , الشهوة , الشراهة(الطفاسة) , الغضب, الحسد , التكبر. عرفت ايه منهم موجود عندك وايه مش موجود لقيت نفسك ايه طماع ولا كسلان ولا ايه؟ وموجود عندك كم واحدة منهم واحدة ولا اتنين ولا اكتر بس من غير ماأعرف ردك ايه خلينى اقولك ان كلهم فينا اه انت بتحسد وكسلان وطماع وطفس ومتكبر و عندك شهوة وبتغضب اقولك ليه اديك مثال شائع وممكن تطبقه على حاجات كتير

بتصلى : لأ

ده انت ياراجل مش هاين عليك تقوم تصلى ركعتين فى خمس دقايق وتقولى مانتاش كسلان

نفسك تبقى زى فلان كده وتصلى الصلاة فى ميعادها لانك عارف ان عدم الصلاة ده اسمه كفر : نفسى

شوفت ازاى انت بتحسد فلان ده على طاعته لربنا وانك عارف ان ده كفر وبتتكبر على ربنا ماانت مش همك عارف انك داخل النار وبرده مقضيها

نفسك تخش الجنة وبتعمل معاصى وبتقول ان شاء الله ربنا هيرحمنى: اه

بذمتك شفت اكتر من كده طمع وطفاسه عمال تعصى ربنا فى حاجات كتيرة وطمعان فى رحمة ربنا وانه يدخلك الجنة ومادام فيه معاصى يبقى فيه بص على الستات والبنات اللى ماشية فأكييد فيه شهوة

واقولك كمان انت بتغضب كتير ولا لأ اقولك اه انت غضبان من نفسك ودايما مخاصمها وبتظلمهاوبتكدب عليها واللى يكدب على نفسه عمره مابيفلح

شوفت بقى قد ايه انت رايح فى داهية وانك فعلا ظلوم وجهول بس برده ربنا غفور رحيم بس لازم تبدأ حالا عشان ربنا يغفرلك ويرحمك والا ................... محمد عبد الوهاب لاعب الاهلى مات وهو بيتدرب ,23 سنة ربنا يرحمه فياريت تخلى بالك وتفكر كويس ولما تاخد القرار يا ريت تاخده صح ويكون كامل يعنى فى طريق واحد مش فى طريقين زى كل مرة لانه لما بيكون اتجاهين مابينفعش. واجتهد على تحقيقه واتحدى فجور نفسك

بسم الله الرحمن الرحيم

وَنَفْسٍ وَمَا سَوَّاهَا (7) فَأَلْهَمَهَا فُجُورَهَا وَتَقْوَاهَا (8) قَدْ أَفْلَحَ مَن زَكَّاهَا (9) وَقَدْ خَابَ مَن دَسَّاهَا (10) صدق الله العظيم

الأحد، سبتمبر 10، 2006

شوية فلسفة

عمرك فكرت ايه الفرق بينك وبين اي حيوان او اى حشرة حتى؟ السؤال ده مش ليك انت بالذات ده سؤال عام والرد الطبيعى ان الانسان حيوان عاقل وبيتكلم وان الحيوان ماعندوش مخ ومابيفكرش غبى يعنى.لو ركزت فى الرد هتعرف ان احنا اللى...............ولا بلاش عشان مانزعلش من بعض.فالحقبقة مش زى مااحنا فاهمين على الاقل من وجهة نظرى المتواضعة. شوف انت مثلا ايه احتياجاتك الضرورية عشان تعيش؟ هتقول اكل واشرب واسكن وانام وطبعا من الطبيعى ان اى واحد فينا يفكر ازاى يلبى احتياجاته دى عن طريق الشغل وانه يجيب فلوس عشان يقدر ياكل و يشرب ويسكن وينام طب ما الحيوان عنده نفس الاحتياجات وبيفكر ازاى يلبى احتياجاته دى واديك على كده مثال صغير وليكن النمل اللى بيعمله بيت فى الرمل او فى الارض عشان يسكن فيه وياخد البذور ويدخلها جوه ويخلى عنده احتياطى منها عشان الظروف مش بس كده ده النمل نابيسبش البذةر دى زى ماهى لأ ده بيطلع الجزء المنبت منها عشان ماتزرعش وتهد بيته على دماغه مش بس كده ده بيقسم البذرة لجزئين ماعدا بذرة واحدة هى الكسبرة بيقسمها اربع تربع لأن العلم الحديث اثبت ان بذرة الكسبرة هى البذرة الوحيدة اللى ممكن تنبت من نص بذرة كامل

اعتقد بعد كل ده ماينفعش نقول ان الحيوان مابفكرش لأ هو بيفكر بس بيفكر فى الاحتياجات اللى ربنا خلقها عنده ولو كان محتاج انه يرفه عن نفسه كان فكر ازاى يرفه عن نفسه احسن مننا لو كان محتاج طيارة عشان يسافر بيها كان فكر فبها بس هو مش محتاج بس البنى ادم ربنا خلق فيه احتياجات كتيرة فبدأ يفكر فيها عشان كده اسمح لى اقولك ان الفرق بينك وبين الحيوان ان ربنا خلق عندك احتياجات مش موجودة عند الحيوان

واضح ان الدماغ كانت عالية النهارده وطلبت شوية فلسفة بس احتمال كتير يوافقونى عليها على الاخص اهالى بر سى م لانهم نفسهم يوفروا البرسيم ومش عارفين واهى كلها احتياجات

بر سى م

احلى دماغ بقت هى دى اكتر حاجة تقريبا بيدور عليها الشعب المصرى اعتقد ان اكتر
من3\4 الشعب بقى بيعمل دماغ وكل واحد بيعيش دماغه زى ماهو عايز يعيشها ماهو عايش مع دماغه بقى ساعات تطلب معاه ضحك فيضحك وساعات تطلب شوية هدوء فيقعد ساكت وساعات تطلب معاه شوية صراحة ويبقى عايز يفضفض عن اللى جواه بس ساعات تبقى الحاجات دى خاصة جدا ومايقدرش يقولها وساعات مايلاقيش الصاحب اللى ممكن يحكيله وساعات بيبقى خايف يتكلم بصراخة فى حاجات معينة زى اللهم احفظنا السياسة مثلا داخلية او خارجية بس نفسه يتكلم
طب يعمل ايه.............................................؟
ماهو نفسه مرة يحس انه بنى ادم وله رأى زى بقيت البنى ادمين هيفضل لحد امتى حمار ؟ بيضرب على ضهره وتتحطله العصايا فى الاموأخذة يجرى احمر من الاول اسف اسرع من الاول وفى الاخر يتحطله شوية برسيم عشان ياكل ماهو حمار
طب يعمل ايه.............................................؟
قعد يفكر الحمار يعمل ايه؟ قال انا اعمل احلى دماغ وافكر فى الحل عمل الحمار احلى دماغ وقعد يفكر ودماغه رايحة جاية ويفكر ومش لاقى حل
طب يعمل ايه............................................؟
قال الحمار انا اعلى الدماغ بقى عشان نجيب من الاخر وعلى الحمار الدماغ معاش مع دماغه لحد ماوصل للحل اخيرا بعد ماسال نفسه سؤال مهمقال هو احنا فين اساسا ردت دماغه وقالت احنا فى بر سى م قال يبقى الحل الوحيد ان احنا نكتر من زراعة البرسيم
وربنا يديمه نعمة

بر سى م كل عام وانتم وبخير

قعد صاحبنا بعد ماعمل الاصطباحة وفتح جرنال الاهرام وشاف اول عنوان وقعد يضحك يضحك يا ترى بيضحك على ايه؟ هو ده السؤال اللى مراته سألته له -وهى جايبه الشاى وجايه تقعد مع جوزها قعدت صفا لان النهارده اول الشهر ورمضان على الابواب والمدارس داخله والبيت محتاج حاجات رمضان والعيال عايزه شنط وجزم والذى منه عشان المدارس داخله- وسألته بتضحك على ايه يا راجل؟ قالها السيد الرئيس يقوم بتوجيهات لرفع المعاناة عن الشعب وتوفير السلع اللازمة عشان رمضان والمدارس فانشرح قلب زوجته من الفرحة بعد سماع هذه الاخبار السعيدة ولم تكتفى بهذا فقط فاصرت ان تسجل اعجابها فى هذا الجهد المبذول والذى سيساعدها على طلب ما تريد من جوزها وقالت: ربنا يخليه لينا دايما حاسس بينا وعارف قد ايه العيشة بقت صعبة على الناس وقال للحكومة تنزل كل حاجة وبأسعار مهاودة عشان الناس تاكل وتلبس وتتبسط. وبعد ماصاحبنا سمع البقين دول بص لمراته وهى مستمرة فى الثنى على مجهودات السيد الرئيس وتساءل فى عقل باله وهو عامل احلى دماغ ياترى السيد الرئيس هيرفع المعاناة ازاى فى اقل من 3 اسابيع؟ وقعد يفكررررررررر ....ويقول طب ازاى ؟ ماهو ماينفعش؟ الحاجة هترخص مثلا ................ مستحيل .......... هيوزعو اكل ولبس على الناس ببلاش مستحيل............ وقال فى عقل باله مافيش غير حل واحد ممكن السيد الرئيس يعمله انه يخلى الشعب مايفكرش يشترى حاجة اساسا ويوفر كل حاجة وباسعار فى متناول ايدى رواد مارينا وعشان صاحبنا يتأكد انه وصل للتفكير السليم سأل نفسه نفس السؤال بتاع المرة اللى فاتت وقال احنا فين اساسا؟ رد وقال احنا فى بر سى م وقال بصوت عالى ربنا يديمه نعمه فسألته مراته هو ايه ده يارجل؟ رد وقال البرسيم

امبارح كان عمرى عشرين

ماعرفش امتى ولا ازاى ولا فين عدو؟
واكتشفت ان اللى عدى كتير. تلاتين سنة من عمرى انتهوا,احاول ان اتذكرهم او اتذكر موقف واحد فقط كامل لا استطيع ولكنى فى نفس الوقت اتذكرهم جمعيابس كله بيخبط فى بعضه افراح على احزان, طفولة على مراهقة على شباب, عزوبية على جواز على اب لطفل ولطفلين نجاح و فشل عيشة حلوة ساعات على عيشة مايعلم بيها الا ربنا ساعاتزولكن هناك اياما كثيرة كتن اشعر عندها ببداية مرحلة جديدة فى حياتى مثل يوم وفاة ابى ثم يوم وفاة امى واول يوم شغل ويوم جوازى ويوم ماخلفت وبقيت اب وهذا اليوم لما تميت التلاتين واول ما سألت به نفسى هو اللى جاى هيبقى قد اللى راح ولا لأ؟ يا ترى العد التنازلى قرب للنهاية ولا لسه؟ولو قرب ايه اللى المفروض اعمله وفكرت كثيرا ولم اجد الا هذا الرأى اننى نويت ان اصوم هذا اليوم ومن حسن حظى ان اليوم هو ليلة النصف من شعبان كل عام وانتم بخيى فلم اجد الا ان ابدأ فى الاقتراب من الله لعلى اعمل صالحا لما سيبقى رغم اننى مازلت ادخن بشراهه كما انا واتمنى ان امتلك العزيمة فى وقت قريب وابطلها ولكننى ساحاول جاهدا على عدم ارتكاب المزيد من المعاصى لعل الله يغفر لنا ما تقدم من ذنب وماتأخر فأرجو من من يقرأ ان يدعو لنا جميعا بالهدى الى الصراط المستقيم.
اكيد فى زى النهارده كتير بيتموا التلاتين وكتير تموها من زمان لو فى حد حس نفس الاحساس ياريت يكتب لي تعليقه
وشكرا

المدونين دول بيعملولى احلى دماغ

شوف وقارن

ابحث مع الشرطة:
انثى زملكاوية ابوها صعيدي مزارع ايراني وامها من المحلة عاملة افغانية من سكان الدويقة مسيحية شيعية عضوة في الاخوان المسلمين من اصول سودانية وفي حركة كفاية

ومش محتاجة يبقى عندها جرب كفاية اللي فيها
ربنا برضه اسمه الرحيم

اذا وجدت الهدف نرجو الاتصال بالجمعية العالمية للتحكم البولي

تحذير لا تلمس الهدف...واذا لمسته امسح ايدك في شارة الحزب الوطني، اوعى ترمي الشارة لان طهارتها متعدية: تطهر غيرها وما تتنجسش
هامش: المحامي بتاعها بورسعيدي بيشجع الاسماعيلي